Животот во градот може да биде лош за менталното здравје на луѓето, бидејќи кај жителите на големите градови, одредени делови во мозокот реагираат посилно на стрес отколку кај оние кои пораснале на село, покажало најновото истражување објавено во американскиот магазин Nature...

Со тоа може да се објасни како животот во градот може да го зголеми ризикот од заболување од шизофренија и други ментални пореметувања, наведуваат научниците кои учествувале во студијата спроведена во Германија.

Една претходна студија дошла до резултат дека растењето во голем град го зголемува ризикот од шизофренија, а пронајдени се и докази дека жителите на градовите се под голем ризик од чести промени на расположението и вознемиреноста.

Во новото истражување учествувале здраво доброволци, чии мозоци се снимени на скенер. Резултатите покажале дека имало значајни разлики во мозочната активност меѓу луѓето кои живеат во градот и оние во руралните области, но неможело да се утврди цврстата поврзаност помеѓу нивните мозочни активности и еветуалните ментални болести.

Истражувачите сакале да утврдат како луѓето реагираат на стрес кој го предизвикуваат други луѓе, и доброволците ги ставиле на скенер и од нив било побарано да решаваат математички проблеми.

Додека биле на скенер, испитаниците можеле да го слушнат гласот на научниците кои ги критикувале поради лошото решавање на задачите.

Истражувањето покажало дека волонтерите од градовите реагирале со повеќе тензија од руралното население, односно била забележана поголема активност на оној дел од нивниот мозок кој реагира на закани од непосредната околина.

Резултатите покажале дека оние кои во детството живееле во поголем град, реагирале со поголема тензија во процесот на истражувањето.