Во 20-те години мамурлакот обично е само мала пречка после лудата забава од минатата ноќ, но во 40-те станува ноќна мора за сите што пијат...



Тоа е и главната причина зошто на повозрасни години се пие помалку, тврдат научниците од Универзитетот во Пенсилванија.

Тие откриле дека главен виновник за тоа е мускулната маса, на чие место доаѓаат маснотиите. Тие содржат помалку вода, поинаку го апсорбираат алкохолот, а колку помалку мускули има во телото, толку полесно доаѓа до дехидрирање.

„Токму тоа дехидрирање е главната причина за мамурлакот“, објаснува авторот на истражувањето, професор Дејвид Ослин.

Втора причина за силната главоболка и мачнината е помалата способност на црниот дроб да го свари алкохолот, кој сè повеќе се задржува во телото после 40-те години, особено после 50-те.

„Постарите луѓе се опиваат побрзо од секоја чаша што ќе ја испијат. Ефектот на алкохолот трае подолго, а симптомите од мамурлакот како што се гадење и главоболки, се полоши“, вели д-р Гери Мареј, од британскиот Институт за злоупотреба на алкохол.

За потешкото поднесување на алкохолот е одговорен мозокот, бидејќи невроните стануваат помалку ефикасни како што старееме. Исто така, важен фактор се лековите кои обично ги консумираат постарите генерации, што уште повеќе го оптоварува црниот дроб.