Слушањето на музика го заздравува срцето и може да помогне во реконструкцијата на луѓето кои страдаат од срцеви заболувања, открија српските научници...

Научниците откриле дека кога луѓето ја слушаат нивната омилена музика, во мозокот се ослободува ендорфин кој го подобрува здравјето на срцето . Истражувачите од Универзитетот во Ниш утврдиле дека музиката без текст е најдобра, бидејќи зборовите можат да не вознемират.

За целите на истражувањето научниците разделиле 74 лица со срцеви заболувања на три групи. Учесниците во првата група требало да прават вежби во текот на три недели, другата група исто да прават вежби, но и да слушаат музика по половина час секој ден, а третата група била замолена да слуша музика, без да прави вежби.

Сите учесници биле тестирани повторно на крајот на третата недела и научниците откриле дека луѓето со срцеви заболувања кои правеле вежби и слушале музика, постигнале значително подобрување. Тие го подобриле функционирањето на срцето, а издржливоста при вежбите се зголемила во просек за 39% .

За разлика од нив групата која правела вежби, но не слушала музика, имала подобрена издржливост само со 29%. Изненадувачки групата која слушала музика, но не правела вежби исто имала подобрена издржливост со 19%. Научниците веруваат дека подобрувањето се должи на ослободувањето на хормоните при слушањето музика.

"Комбинацијата од музика и вежби постигна најголемото подобрување во функционирањето на срцето. Тоа се поврзува со значителното подобрување и на издржливоста при вежбите", изјави шефицата на истражувањето проф. Делјанин Илиќ. "Нема идеална музика и секој човек треба да избере музика која ги зголемува позитивните емоции и го прави среќен или го смирува", советува таа.

Проф. Илиќ смета дека иако студијата вклучувала само луѓе со срцеви заболувања, слушањето музика се одразува позитивно и на луѓе со здраво срце.