Само 20 минути јога на ден го изострува умот, открија американските научници...

Тие откриле дека јогата е поефикасна за јакнење на умот од традиционалниот аеробик. Американските научници утврдиле дека само една вежба со Хата јога значително ја подобрува брзината и точноста на човекот при истражување на работната меморија и концентрација.

"Јогата е древна индиска наука и начин на живот и вклучува не само физички движења и пози, туку исто така и регулирање на дишењето и медитација. Практиката вклучува активно внимание и концентрација, но потенцијалните придобивки од неа не беа целосно истражени", изјави раководителот на истражувањето Нехао Готе, професор по кинезиологија (наука за човечките движења), здравје и спорт од универзитетот Вејн Стејт во Детроит.

За време на експерименталните вежби по јога учесниците беа замолени да направат пози во исправена, седечка и лежечка положба, додека одржуваат стабилно дишење. Вежбите вклучуваа еднаква контракција на различни мускули на телото, при што мускулите се стегаат и опуштаат без никакво движење на екстремитетите.

Вежбите биле следени од медитација, при што учесниците се фокусирале на одредена поза и длабоко дишење. Потоа истражувачите ги натерале учесниците да одат по движечка патека за истиот период од 20 минути, одржувајќи го срцевиот ритам на ниво меѓу 60 и 70% од максимумот.

Тие откриле дека луѓето кои џогирале 20 минути, не успеале да се фокусираат толку на задачите, како по вежбањето јога.

"Се чини дека по тренингот по јога учесниците успеваат подобро да се фокусираат на менталните ресурси, да обработуваат информации брзо, точно и исто така да учат, да се сеќаваат и да вршат надградба на информации поефикасно отколку по тренингот со аеробни вежби . дишењето и медитацијата имаат цел да ги смират умот и телото и да ги отргнат мислите додека сте фокусирани на телото, позицијата и дишењето. Можеби овие процеси се пренесуваат надвор од јогата кога извршувате ментални задачи или секојдневни активности", смета Готе.