Ако престанете да пушите, тоа ќе допринесе не само за вашето физичко, туку и за вашето ментално здравје, заклучиле истражувачите.

Погрешно е убедувањето на пушачите дека оставањето на пушењето ќе ја зголеми нивната нервоза на подолг временски период, покажало едно од истражувањата објавено во британскиот весник BJP.

Пушачите кои успеваат да се откажат од тутунот долгорочно ја намалуваат вознемиреноста, додека кај оние кои не успеваат доаѓа до нејзино зголемување, покажаа резултатите од истражувањето на група британски научници од Кралскиот колеџ во Лондон и универзитетот Саутемптон.

Научниците дошле до тој заклучок со следењето на 491 пушачи, учесници во програма за одвикнување од пушењето во која се комбинираат психотерапија, едукација и лечење со лекови.

Тие преку прашалник го мереле нивото на стресот пред престанување на пушењето, а потоа шест месеци подоцна.

Резултатот покажал дека кај пациентите кај кои успеало одвикнувањето од пушењето дошло до поголемо намалување на вознемиреноста, отколку кај пациентите на кои не им успеало тоа.

Тенденцијата била поизразена кај личностите со некои од психичките заболувања.