Предењето на мачката може брзо да ги реши проблемите на стрес, несоница или вознемиреност без употреба на лекови, што го потврдуваат и сопствениците на тие домашни миленичиња и ветеринарите.

Ветеринарот Жан-Ив Гоше од францускиот град Тулуз кој спроведува „терапија на предење“ истакна дека предењето смирува и делува како „лек без несакани дејства“.

„Кога организмот се бори против тешки ситуации, како што е стресот, предењето на мачката емитува смирувачки и благотворни вуци кои по малку делуваат како музика“, објасни Гоше.

Гоше истакна дека на предењето чии фреквенции се ниски, меѓу 20 и 50 херци, не реагираат само човечките ушни тапанчиња, туку и нервните завршетоци на кожата, па така позитивни мисли и добро расположение се пренесуваат на мозокот на човекот.

Позитивното дејство на мачките, меѓутоа, не се состои само во предењето.

„Мачката е поголемо бебе кое сака да биде галено и бара само да си играте со нега, што во некои случаи го надокнадува емоционалниот недостаток на луѓето без деца“, кажа Гоше.