Пиењето четири чаши чај дневно го намалува ризикот од мозочен удар со над една петтина, покажува шведско истражување...

Научниците кои ја истражувале врската на пиењето на црн чај и мозочен удар, утврдиле дека најмалку четири чаши од миризливиот пијалок дневно го намалуваат ризикот од згрутчување на крвта во мозокот со 21%. Но, пиењето помалку количество чај нема ист ефект.

Заклучоците на научниците од Каролинскиот институт во Стокхолм се базираат на истражувањето на околу 75 000 мажи и жени. Иако многу студии го докажаа поволното влијание на зелениот чај врз мозокот, доказите за истото влијание на црниот чај не беа толку убедливи.

Во рамките на истражувањето научниците ги набљудувале навиките за пиење на чај на учесниците. Откако ги зеле во предвид и другите фактори на ризик за мозочен удар како пушењето или висок крвен притисок, тие утврдиле дека четири или повеќе чаши чај дневно имаат значителен ефект.

Црниот чај е богат со флавоноиди за кои се смета дека се поволни за здравјето и мозокот.
"Чајот е корисен за намалување на ризикот од кардиоваскуларни заболувања поради содржината на флавоноиди. Секојдневното земање на една до три чаши не се поврзува со ризик од мозочен удар. Но, мажите и жените кои конзумираат четири и повеќе чаши дневно, го намалуваат ризикот со 21% во однос на оние кои никогаш не пијат чај", соопштуваат научниците.