Бронхитисот најчесто го предизвикуваат вируси, така што терапијата со антибиотици е бескорисна, утврдија француските научници.

Антибиотиците се бескорисни во случаите на бронхитис кој најчесто е предизвикан од вируси, ги пренесоа француските медиуми резултатите од истражување спроведено во период од ноември 2007 година до април 2010 година во 12 европски земји.

Давањето на амоксицилин, често препишуван антибиотик, на личностите кои имаат бронхитис е контрапродуктивно, покажало истражување спроведено на 2.061 пациент меѓу кои имало некои на кои седум дена им е даван амоксицилин, а на други плацебо (лажен лек).

На крајот имало мали разлики поврзани за траењето или јачината на симптомите на болеста меѓу двете групи, вклучувајќи ги и пациентите постари од 60 години.

Научниците, меѓу другото, истакнале дека истражувањето покажало дека давањето на антибиотици на личности за кои се знае дека немаат воспаление на белите дробови не служи за ништо и дека може да биде контрапродуктивно, затоа што претераната употреба на тие лекови може да поттикне отпорност на нив.

За време на истражувањето личностите кои користеле антибиотици повеќе соопштувале и несакани ефекти (кожни реакции, дијареа, мачина) - 28,7 проценти, а од оние кои употребувале плацебо - 24 проценти.