Ако вежбате пред доручек, побрзо ќе ги изгубите масните наслаги, а и нивото на триглицерид во крвта побрзо ќе се намали...

Истражување спроведено во Велика Британија покажало дека најдобар ефект се постигнува со вежбање во раните утрински часови, пред доручек. Не само што така поефикасно се "топат" вишокот на килограми, туку и нивото на маснотии во крвта што може да доведе до сериозни кардиоваскуларни проблеми, побрзо се снижува.

"Кога зборуваме за слабеење, всушност мислиме на топење на масните наслаги", вели доктор Џејсон Гил. Истражувачите одлучиле да се позанимаваат со прашањето дали е подобро да се вежба по доручек или "на празен стомак".

Мажите кои учествувале во експериментот биле поделени во две групи, од кои едната група брзо пешачела пред доручек а другата по доручек.

Се покажало дека оние кои вежбале пред доручек согореле и до 33% повеќе масти од оние кои вежбале после јадење. Сепак советот да се вежба пред јадење се однесува на вежби кои не се премногу интензивни.

Ако немате желба да се занимавате со физичка активност на празен стомак, не грижете се. Било која вежба, во било кое време, е подобра за вашето здравје отколку да седите и да не правите ништо.