Ново истражување покажало дека жените кои се под стрес имаат 12% помала веројатност за време на плодните денови да забременат отколку жените кои во тоа време се чувствуваат опуштено.

Научниците од Оксфорд сакале да покажат колку е важна опуштеноста за зачнување на дете, поради што прегледале 274 жени кои веќе некое време сакале да останат бремени.

Истражувачите го спровеле тестирањето за да го измерат нивото на кортизол, хормон кој се лачи во стресни ситуации и ензимот наречен алфа-амилаза кој укажува на нивото на адреналинот.

Примероци се земале на шестиот ден од секој менструален циклус за време на шест циклуси, или додека жената не останала бремена.

Резултатите од истражувањето, кои научниците ги објавиле во професионалното списание Fertility and Sterility, покажале дека нивото на кортизол не било поврзано со веројатноста жената да остане бремена.

Меѓутоа, жените со највисоко ниво на алфа-амилаза секој плоден ден во циклусот имале во просек 12% помала шанса да останат бремени во споредба со жените кои имале најниско ниво на тој ензим.

На крај, професионалците на паровите им порачале дека треба да бидат колку што е можно посмирени ако сакаат да имаат потомство.