Пушачите спијат помалку и имаат попроблематичен сон од непушачите, покажува германско истражување. Научниците утврдиле дека од околу 1100 анкетирани пушачи 17% спијат помалку од шест часа на ноќ, а 28% изјавиле дека имаат нарушен сон. Кај испитаните 1200 непушачи овие стапки се 7 и 19%, покажува истражувањето...

"Истражувањето за прв пат покажува зголемено нарушување на спиењето кај пушачите во однос на непушачите. Во истражувањето учествувале луѓе без ментални проблеми", вели раководителот на истражувањето Штефан Корсо.

Откритието не докажува дека пушењето директно му штети на сонот, бидејќи пушачите може да имаат и други штетни навики кои се одразуваат на спиењето, како што се седење до доцна пред телевизорот или ретките вежби, додава истражувачот. Но, во исто време има причини да се верува дека стимулирачките ефекти на никотинот може да се причина за нарушување на сонот.

"Ако пушите и имате проблеми со спиењето, тоа е уште една добра причина да ги откажете цигарите", советува Корсо. Лошиот сон не води само до тешко будење наутро. Претходни истражувања покажаа дека тој е поврзан и со здравствени проблеми како прекумерна тежина, дијабетес и срцеви заболувања.