Ограничувањето на телевизијата со помалку од два часа дневно може да ја зголеми должината на животот за речиси 1,5 години, утврдиле американските научници...

Веќе е познато дека гледањето на премногу телевизија е лошо за срцето, дури и ако човек спортува редовно. Сега американските научници си поставиле задача да пресметаат колку всушност е опасно ако минуваме подолго време на каучот.

Тие ги анализирале претходните истражување и дошле до заклучок дека ако луѓето го ограничат гледањето на телевизија со најмногу два часа на ден, тие ќе живеат во просек за 1,4 години подолго отколку ако не го сторат тоа.

Питер Кацмарзик и Мин Ли од Центарот за биомедицински истражувања во Луизијана, ги истражувале и последиците од вкупното време поминато во седење (главно поради гледање телевизија) врз должината на животот. Тие утврдиле дека ако луѓето го намалат времето во седење до три часа на ден, можат да го продолжат својот живот во просек за две години.

"Резултатите од ова истражување покажуваат дека долгото седење и гледање телевизија може да има потенцијал да ја намали должината на животот на луѓето во САД", сметаат научниците.

Тие дополнуваат дека е потребна "значителна промена" во навиките на луѓето што се однесува на гледањето телевизија и седењето.