Запознаени ли сте со терминот "замрзнат мозок"? Ако не сте, ние ќе ви објасниме - кај некои луѓе земањето на голем залак сладолед (или нешто ладно) води до моментална остра болка во главата. На англиски тоа чувство се вика "brain freeze"...

Научниците долго се обидуваат да ја откријат причината за овој феномен. Се чини дека луѓето кои страдаат од мигрена, почесто го имаат тоа непријатно чувство во споредба со останатите индивидуи.

Една од причините за "замрзнување на мозокот" е промената во движењето на крвта во оваа област. Научниците утврдиле дека овој вид на главоболка се случува при нагло зголемување на крвотокот во предната церебрална артерија.

Експертите шпекулираат дека појавата на оваа ненадејна болка е еден вид заштитен механизам на мозокот против нагли промени во температурите. Тој е чувствителен и затоа го користи протокот на крв за да обезбеди топлина, но черепот е затворена структура. Зголемувањето на количината на крвта води до промена на притисокот што предизвикува болка. Пред да дојде до критично ниво сепак, мозокот ги стеснува крвните садови и ситуацијата се нормализира.

Научниците сметаат дека ова откритие за сладоледот и ненадејната главоболка може да доведе до нови методи за лекување на различните типови на болки во главата.