Музиката не е пријатна само за слушање, таа делува позитивно на духот и на телото...

Без разлика дали обожавате класична музика, поп или жесток рок - фрлете поглед на овие ефекти од музиката:

Го намалува стресот – Научниците од универзитетот во Гетеборг ги проучувале резултатите од две студии и уочиле дека слушањето музика секој ден го намалува стресот и буди позитивни емоции. Сепак, авторите на студијата истакнуваат дека позитивниот ефект се гледа само во случаитe кога луѓето ја слушаат музиката што ја сакаат.

Го подобрува слухот – Луѓето кои слушаат музика имаат подобар слух, а нивниот мозок подобро ги обработува сигналите кои доаѓаат до нив. Една студија од 2011 година покажала дека музичарите кои цел живот свират на некој музички инструмент имаат подобар слух. Во студијата биле вклучени 163 луѓе, од кои 74 свиреле целиот свој живот.

Му помага на срцето - Иако ова звучи неверојатно, лекарите од универзитетската болница во Мериленд пронашле врска меѓу музиката и здравјето на срцето. Научниците откриле дека слушањето на весела, полетна музика ги шири крвните садови и на тој начин ја подобрува циркулацијата. Веселите ноти ги прошируваат крвните садови за 26 проценти, а тешката музика што предизвикува вознемиреност го намалува обемот за 6 проценти.

Ја намалува болката - Истражувачите од универзитетот во Јута забележале дека музиката може да им го одвлече вниманието од болката на луѓето кои се склони кон анксиозност и страв, а резултатот е помалку болка. Студијата била спроведена над 143 луѓе кои или слушале музика или седеле во тишина додека добивале безопасни електрични шокови.

Одлична е за памтењето - Ако вашите родители ве терале да свирите на пијано, гитара, виолина или флејта додека сте биле мали, не ги критикувајте за тоа. Научниците од Хонг Конг покажале дека децата кои имаат музичко образование имаат одлична вербална меморија, односно лесно ги паметат изговорените зборови.

Го одржува мозокот млад - Студијата на универзитетската болница во Канзас, во која биле вклучени 70 луѓе на возраст од 60 до 83, покажа дека луѓето кои имале музичко образование имаат поостар ум и постигнуваат подобри резултати во менталните тестови.

Го забрзува закрепнувањето од мозочен удар - Финските научници во 2008 година објавиле истражување кое покажува дека слушањето музика ја подобрува вербалната меморија и концентрацијата кај пациентите кои се опоравуваат од мозочен удар.