Колку повеќе пиеме, имаме впечаток дека сме поатрактивни и посекси, утврдиле француските истражувачи, истакнувајќи дека ова чувство не е предизвикано од хемиските својства на алкохолот...

Насловена како "Убавината е во окото на пивопијците" (La beaute est dans les yeux du buveur de biere), студијата е работена во соработка со американскиот универзитет во Охајо.

Истражувачите тестирале 19 муштерии во еден бар кои ги повикале да ги оценат своите привлечност, интелигенција, оригиналност и смисла за хумор на скала од 1 до 7, а потоа им го измериле нивото на алкохол во крвта.

Како што се очекувало, тие што имале повеќе алкохол во крвта се чувствувале посекси и попривлечно.

Научниците потоа тестирале 94 мажи во лабораторија. Некои добиле алкохолен пијалак, а други еден вид плацебо, односно мислеле дека пијат алкохол, иако во нивниот пијалак го немало, додека другите пиеле алкохол, а не знаеле за тоа.

Волонтерите, како и во претходниот експеримент, требало да ја оценат својата атрактивност.

Излегува дека сите оние кои мислеле дека се под дејство на алкохол себеси се сметале за многу привлечни, додека оние кои пиеле алкохол без нивно знаење биле со далеку поскромно мислење за себе.

- Нашето истражување покажува дека сме си попривлечни самите на себе при помислата дека пиеме алкохол. Притоа количината на испиениот алкохол нема влијание на нашата слика за себе – вели Лоран Бег, професор по социјална психологија на универзитетот во Гренобл.

Тој објасни дека тоа е последица на културниот феномен, според кој пијалакот нѐ прави попривлечни.