Нежните звуци на Френк Синатра им помагаат на пациентите да се релаксираат, а во некои случаи дури и побрзо да оздрават, велат истражувачите...

Хитовите како "I've got you under my skin" го намалуваат стравот кај пациентите кои за време на операцијата мора да останат будни. Класичната музика била најчестиот избор на хирурзите и пациентите кои учествувале во истражувањето на една оксфордска болница.

Хирурзите од Одделот за пластична и реконструктивна хирургија, анализирале 96 пациенти поделени во две групи. На првата група за време на операцијата и пуштале музика, а втората група пациенти била оперирана во нормални услови. Во двете групи имало пациенти со полесни повреди на кожата, но и такви кои ги очекуваат посериозни реконструктивни процедури на рацете или нозете.

Нивната вознемиреност и страв се мереле преку следење на дишењето,а пациентите и сами им кажувале на докторите колкаво ниво на вознемиреност чувствуваат. Истражувањето покажало дека пациентите кои слушале музика биле до 29 проценти помалку вознемирени од другите.

Еден од хирурзите кои биле вклучени, рекол дека музиката им помогнала на пациентите да не мислат на операцијата. "Одлично ја прифатија музиката. Дури и најмалата операција може да предизвика стрес. Се одлучивме за релаксирачка музика. Главно, Бетовен, Вивалди и Синатра", изјавил хирургот Апул Парик.

"Не смееме да ги заборавиме и оние чисто практични причини. Смирените пациенти многу подобро се справуваат со болката и побрзо закрепнуваат", вели Хзим Садиден, водач на експериментот. Истражувањето покажало дека вознемиреноста пред операција може да предизвика физички, воспалителни реакции кои можат значително да го продолжат периодот на заздравување.

Една неодамнешна студија покажа дека слушањето музика им помага на пациентите кои се опоравуваат од мозочен удар, но и на оние кои страдаат од деменција. Всушност, слушањето музика им помага полесно да се потсетат на минатите настани.