Американските научници веруваат дека го откриле генот кој создава постојано чувство на глад и не тера да јадеме дури и тогаш кога сме сити.

Овој ген, кој научниците го нарекле „ген за ждерење“, е главен виновник што до мозокот не допира информацијата за ситост.

Во студијата, објавена во списанието Nature Medicine, научниците од Медицинскиот ценат на универзитетот во Џорџтаун објаснуваат дека тестовите кои ги спровеле на глувчињата покажале дека мутацијата на еден ген го блокира преносот на сигнали до мозочните клетки, што доведува до ждерење и забрзано трупење на килограми.

Имено, глувчињата кај кои оваа мутација е предизвикана јаделе 80% повеќе храна отколку обично.

Истражувачите веруваат дека нивното откритие ќе помогне во иднина да се откријат нови видови на лечење на дебелоста.

Научниците кои ја проучуваат врската меѓу генот и дебелоста, наведуваат дека има од 40% до 70% разлика во тежината меѓу две личности како резултат на генетиката.