Обрезаните мажи се под нешто помал ризик да заболат од рак на простата, укажува американска студија објавена во Истражувачкиот центар за рак Фред Хачинсон во Сиетл.

Досега се утврдени уште некои здравствени предности од обрезувањето. Така Светската здравствена организација го препорачува како начин да се намали заразата со ХИВ вирусот.

Минатата година е утврдено дека партнерките на обрезаните мажи се под помал ризик од зараза со хумани папилом вирусот, кој може да доведе до рака на грлото на матката и уште некои видови канцер.

Минатата недела едно истражување во Африка покажало дека обрезаните мажи се помалку склони кон специфичен вид на херпес отколку необрезаните.

Иако поголемиот број Американци не се обрезани, во последната деценија таа процедура станува се помалку популарна и многу групации се против истата. Во септември Кралското холандско здружение оваа интервенција ја нарекло „болен и штетен ритуал“.

Тимот од Сиетл, со кој раководел Џонатан Рајтер го извршил истражувањето на повеќе од 1.600 мажи, кои одговарале на прашања за својот сексуален живот, здравствената историја, како и за тоа дали се обрезани или не. Половина од испитаниците страдале од рак на простата.

Утврдено е дека обрезаните се изложени на 15% помал ризик од рак на простата, дури и откако се земени во обѕир факторите како што се возраста и расата на испитаниците.

Едно од можните објаснувања за помал ризик од рак на простата кај обрезаните е тоа што на кожичката на половиот орган за време на сексот доаѓа до мали повреди, низ кои бактериите и вирусите можат да влезат во крвотокот, а познато е дека некои вируси можат да предизвикаат рак кога ќе се инкорпорираат во човечката ДНК.

Другото објаснување би можело да биде дека микроорганизмите, кои дошле во телото на мажот преку повредите на кожичката на половиот орган, можат да предизвикат хроничен воспален процез од кој може да се развие рак.