Зависникот од фитнес, американецот Стивен Маркович дошол на идеја како да остане во форма, а истовремено да ја одржува куќата чиста.

Неговото „аеробично расчистување на куќата“ (Aerobic House Cleaning) се состои од серија вежби засновани на домашни работи како што се правосмукување, бришење на прашината и миење на прозорците.

„Луѓето годишно трошат милиони на фитнес клубови, справи за вежбање дома и глупи таблети за слабеење“, вели овој 57 годишен информатички аналитичар, додавајќи дека за неговата програма не е потребна никаква посебна спортска опрема, туку само малку добра волја.

„Сакав да им покажам на луѓето кои имаат вишок килограми дека можат да ослабнат и брзо да дојдат во форма на многу едноставен начин“, додава тој.

„Секој мора да го чисти својот дом, па зошто тоа да не биде шанса за малку гимнастика?“, наведува Маркович чии вежби моментално се многу популарни во Америка.

За него, правосмукалката е најсестран уред - справа за вежбање. Со неа можете да правите клекнувања, истегнувања, расчекори, склекови.

„Додека правосмукувате можете да ги билдате мускулите со кревање на мебел“, објаснува Маркович чија омилена вежба е подигање на каучот со една рака и правосмукување со другата рака додека ногата е истегната.

Овој татко на две деца од Кентаки одлучил да ја издаде својата прва книга Aerobic House Cleaning со интересни вежби кои можат да се прават дома, а наскоро би требало да биде и ѕвездата на ново реално шоу.