Обидете се да им понудите колку што може пошарена храна...

Ако вашето дете одбива да јаде, понудете му што пошарени намирници, во различни бои, а во некои случаи помага и досетливо аранжираната храна.

Психолозите велат дека на децата ги привлечува оброк сочинет од намирници во шест различни бои. „Она што децата го сметаат за примамливо често многу се разликува од она што им е привлечно на возрасните. Ако вашето дете одбива да го изеде тоа што му е на чинијата, обидете се да го промените својот пристап“, порачуваат научниците од универзитетот Корнел.

Судејќи според резултатите од нивното истражување, детскиот апетит го поттикнуваат оброци во кои се употребени намирници во шест различни бои, а ефектот е уште подобар ако храната е аранжирана така што прави некои облици, цвеќе или срце, на пример.

Во истражувањето учествувале 23 деца и 46 возрасни личности, а на испитаниците им се покажувани фотографии од чинии со различни комбинации на храна.

Излегло дека на децата повеќе ги привлекуваат комбинации на намирници во различни бои, а шансите дека децата ќе изедат се што им е сервирано растат пропорционално со изборот кој им е понуден. Студијата покажала дека децата скаат оброци сочинети од намирници во шест различни бои, додека возрасните попрво би се одлучиле за „тробоен“ оброк.

Исто така, децата повеќе сакаат главниот дел од оброкот, месото или рибата, на пример, да им се наоѓа во делот од чинијата кој им е најблизу.

„Децата не само што сакаат во чинијата да има што повеќе бои, туку сакаат и главното јадење да им е ‘близу’, како и прилозите да формираат некои смешни облици“, вели доктор Брајан Вонсинк, кој бил шеф на истражувачкиот тим.

Немојте на децата храната да им ја сервирате на ист начин како и на возрасните. Сонце од моркови или срце од грашок можат да бидат едноставно решение за децата кои одбиваат да јадат.