За килограмот или два кои ги додаваме за време на зимата се виновни лошото време и „сезонската“ депресија, но и калоричната храна и намалената активност. Значи, не убивајте го времето пред телевизорот, туку правец - шетање!

Топлата гардероба, која ја облекуваме со доаѓањето на ладните денови, го крие телото така што на него мислиме многу помалку, па не треба да се чудиме што во просек се здебелуваме меѓу 1,5 и 2 килограми за време на зимата, објаснуваат британските лекари.

Постои теорија според која генетски сме програмирани во есента да ја акумулираме маснотијата за да можеме да ја преживееме зимата. Проблемот е во тоа што повеќе не мораме да трупаме сало затоа што имаме доволно храна во текот на целата година, предупредуваат лекарите.

На зголемениот апетит во текот на зимските денови, исто така влијае и мелатонинот, популарно наречен „хормон на спиење“, кој се повеќе се лачи во зимата и есента и кој кај некои личности поттикнува чувство на глад.

Лекарите како причина за добивањето на килажа ја наведуваат и промената на видот на храната која во зима е помрсна и покалорична, но и депресивните состојби кои обично го следат оваа годишно време, а кои некои личности ги „лечат“ со слатки задоволства.

Намалувањето на витаминот D може, наводно, да влијае на килажата, иако тоа сè уште не е научно докажано.

„Изгледа дека недостатокот на витамин D го успорува разградувањето на масните наслаги“, објаснуваат британските лекари, советувајќи што повеќе да се изложуваме на дневно светло и да јадеме мрсна риба богата со овој витамин. Со сè пократките денови и пониските температури, луѓето се посклони да остануваат дома, убивајќи го времето пред телевизорот.

Без физичка активност нема губење на калории, предупредуваат лекарите, препорачувајќи бавење со спорт и во текот на зимските месеци.