Со редовно и правилно миење на рацете можат да се избегнат бројни заразни болести, потсетуваат лекарите по повот Светски ден на чистите раце кој денеска се обележува ширум светот...
Валканите и рацете загадени со микроби имаат клучно значење во пренесувањето на цревните, респираторни и кожни заразни болести, предупредуваат лекарите.
Миењето на рацете со сапун е една од најефективните мерки за превенција од дијареа и воспаление на белите дробови, а тоа се болести кои се најодговорни за умирање на децата помали од година дена. Некои податоци покажуваат дека секоја година околу 3,5 милиони деца во светот не го доживеваат својот прв роденден, токму поради дијареа и воспаление на белите дробови.
Ширењето на навиката за миење на рацете со сапун и топла вода може значајно да допринесе во достигањето на целта на милениумот - намалување на умирањето на децата на возраст до пет години до 2015 година за две третини.
Лекарите советуваат дека рацете не треба да се мијат само пред јадење или кога се видно извалкани, туку и по користењето на тоалетот, после допирање на устата, носот или очите, по контакт со болна личност, но и за време на секојдневните активности во домаќинството.
За миење на рацете најдобар е течниот сапун, а ако се користи тврд сапун треба после употребата да се измие под млаз вода и да се чува сув, препорачуваат лекарите и додаваат дека е важно добро да се истрие целата површина на кожата на рацете.
Во некои ситуации пожелно е да се направи и дезинфекција на рацете, за што Светската здравствена организација препорачува средства на база на етил алкохол или изопропанол.
Генералниот собир на Обединетите нации, на иницијатива на меѓународната коалиција „Миење на раце со сапун“, ја прогласи 2008 година за Меѓународна година на санитација и тогаш прв пат е обележан Светскиот ден на чистите раце - 15 октомври, кој денеска се обележува во околу 70 земји.
