Долгорочниот стрес за време на растењето донесува зголемен ризик од здравствени проблеми, затоа што ниво на хормонот на стрес континуирано се зголемува...

Децата кои се злоставувани, кои го изгубиле едниот родител или на некој друг начин имале несреќно детство, можат подоцна во животот да имаат хронични здравствени проблеми, покажа неодамна објавената меѓународна студија.

Студијата е објавена во медицинското списание „Архиви на општата психијатрија“, заснована на истражувањето во кое учествувале повеќе од 18.000 млади од 10 земји и кои рекле дека имале несреќно детство, покажала дека во возрасниот период страдале од болести на срце, артритис, астма, дијабетис и други болести.

Истражувањето покажало, исто така, дека од истите болести страдале и оние кои во животниот век пред 21 година страдале од депресија, анксиозност и други ментални пореметувања, пренесуваат британските медиуми.

„Добиените резултати не значат дека несреќното детство дефинитивно води кон влошена психичка состојба, но постои низа показатели дека овие две работи се поврзани“, рече водичот на студијата, др. Кејт Скот од универзитетот во новозеландската област Отаго.

Таа навела дека траумите доживеани во детството можат да го обликуваат подоцнежното однесување или животот на една личност - личноста може да почне да пуши, да пие или да се прејадува за да излезе на крај со траумите.

Исто така, млади луѓе кои страдаат од депресија или други ментални проблеми, решението можат да го најдат во цигарите или алкохолот.

„Од ова можеме да видиме дека и несреќното детство и боледувањето од ментални пореметувања независно едно од друго го ‘обликуваат’ подоцнежното однесување во животот“, истакна таа.

Др. Скот нагласи дека долгорочниот стрес, како кај децата кои долго време се злоставувани, со сигурност допринесува заболување од здравствени проблеми, затоа што нивото на хормон на стрес постојано се зголемува.

Во прилог на тоа оди фактот дека испитаниците, кои навеле барем три стресни ситуации од своето детство, имале и до два пати поголем ризик да заболат од болест на срцето, артритис... Слично било и кај возрасните кои пред 21 година од животот страдале од депресија, паника или некое друго ментално пореметување.