Шпанија Екипата на Барселона потврди дека е постигната согласност со Тиаго Алкантара за продолжување на договорот за уште две сезони до 30ти јуни 2015...

20 годишниот фудбалер од средниот ред важи за голем талент и својот квалитет го покажа и на Европското Првенство за фудбалери до 21 година каде што беше клучен играч на селекцијата на Шпанија која стигна до златниот медал.

Поради обидите на Барселона да го ангажира Цеск Фабрегас се шпекулираше дека Тиаго Алкантара би можел да замине од Камп Ноу во потрага на регуларен фудбал.

Се појавија гласини кои го поврзуваа фудбалерот со неколку клубови од Англија а исто така се пишуваше дека Манчестер Јунајтед е подготвен да одвои 15 милиони фунти за ангажман на Тиаго Алкантара.

Но фудбалерот постојано велеше дека сака да остане во Барселона и денеска тој ја продолжи верноста со Каталонците до 2015.

“ФК Барселона може да соопшти дека е постигната согласност со Тиаго Алкантара за продолжување на договорот - со подобри финансиски услови - со клубот за уште две сезони до 30ти јуни 2015.” – гласеше соопштението на fcbarcelona.com.

“Откупната клаузула во новиот договор е поставена на 90 милиони евра. Фудбалерот ќе стави потпис на документите во среда во 17 часот.”

Powered by: 24 FUDBAL.com.mk