Лига на Шампиони Според пишувањата на Marca, УЕФА би можела да му изрече драстична казна на Жозе Мурињо од седум натпревари суспензија

УЕФА покрена дисциплинска постапка против ’Специјалниот’ откако Жозе Мурињо упати критики кон Европската куќа на фудбалот по поразот на Реал Мадрид од Барселона од 2-0 на првиот натпревар од полу-финалето од Лигата на Шампионите што минатата недела се одигра на Сантијаго Бернабеу.

Мурињо беше бесен на одлуката на судијата да му се додели директен црвен картон на Пепе и по крајот на средбата говореше за заговор и за тоа како УЕФА секогаш и дава поддршка на Барселона.

Според пишувањата на Marca ваквите зборови можат да му донесат на Мурињо драстична казна.

УЕФА денеска треба да ја соопшти казната за тренерот на Реал Мадрид а според мадридскиот весник, Европската куќа на фудбалот на Мурињо ќе му изрече суспензија од седум натпревари и ова ќе го искористи како пример и потсетник за идни можни случувања.

Доколку ваквата казна биде потврдена, Мурињо нема да може да седи на клупата на Реал во целокупниот дел од фазата по групи во сезоната 2011/2012 од Лигата на Шампионите со оглед на тоа дека стратегот веќе одлежа еден натпревар суспензија на средбата што во вторникот Реал ја одигра на Камп Ноу.

Marca исто така пишува дека ниту Мурињо ниту Реал Мадрид нема да ја прифатат евентуалната ваква казна па ќе поднесат неколку жалби, ако е потребно и до Судот за Спортска Арбитража.

Powered by: 24 FUDBAL.com.mk