Шпанија Реал Мадрид потврди дека Кристијано Роналдо ќе паузира од 10 до 15 дена поради повреда на задната ложа на левата нога

Португалскиот интернационалец се повреди при постигнувањето на својот трет погодок на вчерашната средба против Малага во која Реал Мадрид на Сантијаго Бернабеу победи со високи 7-0.
Утрово врз Кристијано Роналдо беа извршени детални тестови по кои CR7 на својот Твитер профил изрази надеж дека ќе може да настапи на средбата против Расинг Сантандер во недела.

Но ваквиот оптимизам на Роналдо се покажа како неоснован откако Реал Мадрид сега соопшти дека Португалецот ќе паузира од 10 до 15 дена.

“Откако Роналдо утрово замина на магнетна резонанса, беше утврдена исекотина од прв степен во задната ложа на левата нога.” – гласеше соопштението на официјалната веб страна на Реал.

“Роналдо сега ќе паузира од 10 до 15 дена. Неговото опоравување ќе биде следено од лекарскиот тим.”

Со ваква дијагноза, CR7 ќе го пропушти гостувањето на Реал Мадрид кај Расинг Сантандер како и средбата на Бернабеу против Херкулес.

За очекување е португалскиот интернационалец да се опорави на време за реванш натпреварот против Лион во 1/8 – финалето од Лигата на Шампионите.

Powered by: 24 FUDBAL.com.mk