Италија Масимо Алегри вели дека победата на Милан над Наполи е сосема заслужена и покрај контроверзниот пенал.

Милан синоќа убедливо со 3-0 го победи Наполи на Сан Сиро, Росоњерите изгледаа надмоќно над својот противник но резултатот го отворија од сомнително досуден пенал.
Алегри признава дека пеналот не е чист, но тренерот на Милан смета дека победата е сосема заслужена.

"Од онаму каде што бев јас изгледаше како пенал, но кога ќе ги видите повторените снимки ситуацијата изгледа сомнителна" - признава Алегри.

"Но без оглед на инцидентот, игравме добро. Не му дозволивме на Наполи да има ниту еден шут на голот и мислам дека победата е заслужена".

"Игравме многу добро во првото полувреме, но правевме многу грешки во нападот".

"Ми се допаѓа нашиот карактер, среќен сум поради она што го направија момците, гледајќи ги како играат во половината на Наполи сите 90 минути".

Кевин Принс Боатенг се врати по паузата поради повреда и остави силен впечаток, го постигна и вториот гол на натпреварот.

"Среќен сум со победата но среќен сум и поради тоа што повредените фудбалери се враќаат во полна форма. Некои важни елементи се враќаат".

"Боатенг е тип на фудбалер кој може да го скрши натпреварот кога ќе влезе, исто како Робињо што направи против Парма и Пато минатата недела".

Алегри исто така беше запрашан и за шпекулациите кои го поврзуваат Кака со враќање на Сан Сиро, таткото на фудбалерот кој е и негов агент бил присутен на синоќешниот натпревар на Милан.

"Маркетот е затворен сега. Треба само да се сконцентрираме на нашите цели кои се Калчото и Лигата на Шампионите".

"Не можеме сега да мислиме на нешто друго, а потоа кога ќе дојде лето, ќе почекаме и ќе видиме што ќе се случи".

Powered by: 24 FUDBAL.com.mk