Англија Енди Керол вели дека во Ливерпул веќе се чувствува како дома и вети дека ќе покаже зошто ’Црвените’ мораа да платат 35 милиони фунти за неговиот ангажман
Англискиот интернационалец, кој е рекорден трансфер на Ливерпул, не е загрижен поради високите 35 милиони кои ’Црвените’ ги платија за негов ангажман.
22 годишниот напаѓач го доби дресот со бројот 9, кој претходно го носеше Фернандо Торес, но Керол не сака да биде споредуван со шпанскиот интернационалец.
На денешната прес-конференција за медиумите, на која Керол беше претставен како фудбалер на Ливерпул, напаѓачот рече: “Трансферот чинеше многу пари но потребно е јас да го направам она што се очекува од мене за да покажам дека вредам тoлку.”
“Тука сум за да постигнувам погодоци и да креирам шанси за тимот и можам да го правам тоа.”
“Постигнував погодоци за Њукасл и сакам истото да го правам и тука – едноставно ќе треба да почекаме и да видиме (дали вредело да се плати толкава сума).”
“Очигледно Торес беше одличен фудбалер но јас треба да се концентрирам на мојата сопствена игра и да го играм мојот фудбал.”
Откако се реализираше трансферот, Керол откри дека практично бил набркан од Сент Џејсм Парк зошто тој не побарал да биде продаден.
Но англискиот интернационалец сега не сакаше да говори за тоа што се случило во последниот ден од зимскиот трансфер период.
“Имам огромна почит кон Њукасл, тоа е мојот тим, мојот домашен клуб и нема да зборувам за тоа што се случи.”
“Њукасл ми значи многу но сега сум во Ливерпул и треба да се концентрирам само на тоа.”
За пречекот што го добил на Енфилд, Керол рече: “Имав фантастичен пречек. Фановите се одлични со мене. Во понеделникот имаше стотина фанови пред тренинг центарот кои чекаа да се појавам.”
“Се чувствувам како дома. Тука сум само три дена но сите одлично ме пречекаа.”
Powered by: 24 FUDBAL.com.mk
