Лига на Шампиони Претседателот на Интер, Масимо Морати и тренерот Рафаел Бенитез очекуваат интерес дуел со Баерн Минхен во осмина-финалето од Лигата на Шампионите
На денешната ждрепка во Нион, актуелниот шампион Интер како противник во првата нок-аут фаза од Лигата на Шампионите го доби за противник Баерн Минхен со што ќе видиме реприза од финалето на минатогодишното издание на најелитното Европско натпреварување.
Морати и Бенитез, кои се во Абу Даби каде што Нероаѕурите утре ќе го играат финалето од Светското Клупско Првенство, изјавија дека очекуваат средбата со Баварците да биде интересна.
Претседателот на Интер рече: “Ждрепката е интересна. За Баерн ова ќе биде еден вид на шанса за одмазда.”
“Потребно е да видиме во какви услови ќе пристапиме на овој дуел кога ќе продолжат натпреварите од Лигата на Шампионите, како од психолошки аспект така и од физички.”
“Веќе се имаме сретнато со Баерн многу пати: ова е историски дуел, но рано е да се суди, натпреварот се игра за неколку месеци.”
При ждрепката Интер успеа да ги одбегне екипите од Шпанија и Англија, па Морати додаде: “Минатата сезона во нок-аут фазата започнавме против тим од Англија па игравме против тим од Шпанија, додека оваа година започнуваме против Баерн. Ќе видиме што ќе се случи.“
Стратегот Рафа Бенитез рече: “Мислам дека ќе биде интересно за фановите и играчите на теренот кои беа актери на финалето во Мадрид.”
“Баерн Минхен е многу добар тим, предводен од одличен тренер.”
“Но сега за нас најважен е утрешниот натпревар.”
Powered by: 24 FUDBAL.com.mk
