Англија Карлос Тевез, кој побара да замине од Манчестер Сити, утрово се врати во тренинг кампот на клубот во Керингтон

Управата на Сити веќе го одби барањето за трансфер на аргентинскиот интернационалец и клубот сака да го задржи напаѓачот и покрај тоа што Тевез истакна дека односите ’со одредени директори и индивидуи во клубот се нарушени и не можат да се поправат’.

Аргентинецот денеска се врати во тренинг центарот на клубот во Керингтон откако Роберто Манчини му дозволи да замине на одмор, кој се претпоставуваше дека Тевез ќе го искористи за посета на семејството во Аргентина, но се шпекулира дека напаѓачот отпатувал за Тенерифе.

Манчини не присуствуваше на тренингот бидејќи стратегот е во Италија каде што ќе замине на ситна операција на окото во пресрет на средбата против Јувентус што се игра во четврток во Торино.

Со оглед дека ’Граѓаните’ веќе имаат обезбедено пласман во нок-аут фазата од Лига Европа, за очекување е Манчини во Италија да однесе ослабен состав во кој нема да биде ниту Тевез.

Медиумите најавуваат дека Манчини и Тевез ќе имаат средба во петок и останува да се види каков ќе биде личнот став на стратегот околу целата ситуација.

Шпекулациите велат дека од управата на Сити ќе останат на ставот дека Тевез не е на продажба во јануари и ќе бараат голема оштета (се говори за бројката од околу 50 милиони фунти) од Тевез и неговиот агент Киа Јорбачијан доколк играчот реши да се пензионира или пак одбие да игра.

Powered by: 24 FUDBAL.com.mk