Шпанија Жозе Мурињо не го крие разочарувањето по поразот од Барселона, но верува дека тие ќе се вратат уште на следниот натпревар против Валенсија.
Реал Мадрид синоќа беше торпедиран на Камп Ноу, Барселона уште еднаш го прегази својот голем ривал.
Се чини дека ниту најоптимистичките навивачи во редовите на каталонскиот тим не очекуваа победа од 5-0, а фановите на Реал се надеваа и на победа под водство на Мурињо.
Португалецот е разочаран од резултатот, но се обидува психолошки да влијае позитивно на својот тим и верува дека ќе им се врати на победите веќе во дуелот против Валенсија.
"Не сум понижен. Ова е најголемиот пораз кој сум го доживеал во лига натпревар" - изјави Жозе Мурињо по синоќешниот натпревар.
"Ова не е еден од оние порази добиени поради тоа што не сме заслужиле да загубиме, судијата бил лош или сме погодиле статива. Едниот тим одигра добро, другиот тим одигра лошо. Заслужена победа и заслужен пораз".
"Овој тим на Барселона со години игра заедно. Реал Мадрид не е завршен продукт и потребно е многу време за да бидеме како едно".
"Тажен сум, бидејќи никој не сака да губи, особено не со толку голема разлика".
"Се надевам дека тоа нема да има психолошки ефект врз фудбалерите. Им го кажав токму тоа. Првенството не завршува денеска".
"Кој знае дали ние ќе се вратиме на овој стадион оваа сезона повторно? Минатата година тука загубивме со Интер, но по неколку месеци се вративме и се квалификувавме во финалето од Лигата на Шампионите, тие го гледаа тој натпревар на ТВ".
"Не можете да плачете кога ќе загубите со четири или пет гола. Мора да се вратите, да работите и да победите на следниот натпревар. Сакам натпреварот со Валенсија да се игра утре, не во сабота. После толку лош натпревар морате да се вратите, да работите, играте и победите".
"Разочаран сум бидејќи очекував многу повеќе, но истото го очекуваа и фудбалерите. Сите очекувавме многу повеќе. Сите го чувствуваме истото, но натпреварот е завршен".
Powered by: 24 FUDBAL.com.mk
