Шпанија Барселона го прегази Реал Мадрид, Кралевите на колена на Камп Ноу, Каталонците уште еднаш го понижија својот најголем ривал.
Барселона му нанесе нов срам на Реал Мадрид, Каталонскиот тим победи со фантастични 5-0 и ја забележа петата Ел Класико победа во серија.
Пораз потежок и од оние 6-2, уште посладок за Барса бидејќи на клупата на Реал Мадрид седеше стариот должник, Жозе Мурињо.
Португалецот ја загуби битката со Гвардиола, најубедлив пораз во тренерската кариера на Мурињо.
Каталонскиот тим одигра фантастичен натпревар, изгледаше совршено, Реал Мадрид комплетно потфрли, и доби голема шлаканица.
Уште на самиот старт Лео Меси можеше да постигне убав погодок, но неговиот удар ја погоди стативата од голот на Касиљас.
Сепак за отварање на резултатот не се чекаше многу, во 10та минута Чави постигнува гол за голема радост на Камп Ноу и водство на Барса од 1-0.
Само осум минути подоцна, Касиљас повторно ја вади топката од мражата, овој пат по асистенција од Давид Виља, Педро реализира за 2-0.
Како одминуваше натпреварот, Реал Мадрид почесто се обидуваше да дојде до намалување на резултатот, но сето тоа изгледаше неопасно.
Единствено Кристијано Роналдо од слободен удар упати шут кој може да се нарече посериозен обид.
Во второто полувреме ништо ново, Барселона ја продолжи доминацијата, Реал Мадрид изгледаше уште полошо.
По десет минути игра и во вториот дел, Барса постигна гол, овој пат Меси асистира до Давид Виља кој постигнува гол за убедлива предност од 3-0.
Само три минути подоцна, истите актери во главните улоги, Меси до Виља, 4-0.
Пред самиот крај на натпреварот, Жефрен реализираше за петарда во голот на Икер Касиљас.
Натпреварот изобилуваше со неспортски дуели, остри стартови, глума, картони.
Во 90та минута Серхио Рамос оправдано доби црвен картон по остар старт над Лео Меси.
Се на се, историско класико кое засекогаш ќе биде запаметено од навивачите на Барселона.
Powered by: 24 FUDBAL.com.mk
