Шпанија Според пишувањата на Marca, Гонзало Игуаин нема да настапи на вечерашната средба против Барселона бидејќи сеуште не може да се опорави од повредата

Аргентинскиот интернационалец кој заработи повреда на средбата против Атлетик Билбао што се одигра на 20ти ноември беше вклучен во составот од 20 фудбалери на Жозе Мурињо кои отпатуваа за Барселона.

На вчерашната прес-конференција ’Специјалниот’ истакна дека на Камп Ноу планира да го употреби вообичаениот состав кој го користи оваа сезона.

Но според Marca, Жозе Мурињо ќе треба да прави промени бидејќи Гонзало Игуаин нема да настапи на Ел Класико.

Весникот вели дека утрово врз напаѓачот биле спроведени серија тестови кои покажале дека Игуаин не е подготвен за настап.

Сега се шпекулира дека стратегот на Реал Мадрид размислува за две алтернативи.

Најприродната промена би била во стартниот состав на Жозе Мурињо да се појави Карим Бензема, кој е логичка замена за Игуаин.

Но можно е Жозе Мурињо во стартниот состав да го вметне Ласана Диара, кој ќе игра во линија со Чаби Алонсо и Сами Кедира а офанзивата би ја сочинувале, Анхел Ди Марија, Месут Озил и Кристијано Роналдо, кој ќе игра како класичен напаѓач.

AS, кој е уште еден весник близок до управата на Реал, исто така вели дека Гонзало Игуаин е под голем знак прашалник за вечерашната средба помеѓу Барселона и Реал Мадрид, но се малку пооптимистички околу инволвираноста на напаѓачот и говорат дека Аргентинецот би можел да настапи од клупата за резерви во вториот дел.

Powered by: 24 FUDBAL.com.mk