Останато Ајакс потврди дека Луис Суарез ја прифаќа понудата на Фудбалската Федерација на Холандија за суспензија од седум натпревари

Фудбалската Федерација на Холандија (KNVB) на Ајакс и Луис Суарез им предложи суспензија од седум натпревари откако интернационалецот од Уругвај го гризна играчот од средниот ред на ПСВ, Отман Бакал на дерби средбата помеѓу Ајакс и ПСВ во саботата.

Ајакс веќе му изрече казна на Суарез и го суспендираше од два натпревари но казната на Фудбалската Федерација на Холандија е многу поголема.

ФФХ до Ајакс и Суарез доставија предлог за суспензија од седум натпревари и можност до крајот на денов Ајакс и играчот да се произнесат по ваквата одлука.

Доколку предлогот биде одбиен од страна на клубот од Амстердам, целиот случај ќе биде дискутиран на рочиште кое ќе се одржи утре.

Но Ајакс, со соопштение на својата официјална веб страна потврди дека предлогот на ФФХ за суспензија од седум натпревари на Луис Суарез е прифатен.

“Ајакс и Луис Суарез ја прифатија понудата од Фудбалската федерација за суспензија од седум натпревари.” – гласеше соопштението на Ајакс.

Суарез, кој вчера настапи против Реал Мадрид ќе биде на располагање и за средбата од Лигата на Шампионите против Милан што се игра на 8ми декември.

Но затоа пак напаѓачот ќе ги пропушти следните шест натпревари на Ајакс во домашниот шампионат како и една средба во Купот на Холандија.

Интернационалецот од Уругвај ќе може да настапува повторно за тимот од Амстердам дури на средбата против Де Графшап што се игра на 4ти февруари 2011.

Powered by: 24 FUDBAL.com.mk