Шпанија Тренерот на Реал Мадрид, Жозе Мурињо е задоволен од победата над Атлетико и најави дека Бензема ќе биде стартер против Мурсија.
Мурињо го доби своето прво градско дерби против Атлетико, Португалецот е среќен поради триумфот и комплетно задоволен од изданието на своите фудбалери.
Жозе смета дека стрелецот на првиот гол, Рикардо Карваљо и Сами Кедира биле најдобри на теренот против Атлетико Мадрид.
"Атлетико е тимот кој до сега ни зададе најмногу грижа на Бернабеу. Игравме против некои добри тимови како Милан, но кога играте против Рејес, Симао, Кун и Форлан играте против четворица од најдобрите фудбалери во лигата" - вели Мурињо.
"Не сум загрижен затоа што не вршевме притисок и во финишот. Откако постигнавме два гола, требаше да играме и да размислуваме на разрешување на проблемите кои ги имавме. Доколку можеме да постигнеме три-четири гола, тогаш одлично, но доколку не можеме, треба да бидеме внимателни бидејќи тимовите можат да не казнат".
"Атлетико ја погодија стативата и создадоа неколку добри шанси. Резултатот од 2-0 е перфектен, и сакам да добивам натпревари на овој начин. Задоволен сум".
"Дефанзивните фудбалери постигнуваат голови. Два, три или четири годишно. Тие можат да постигнат од прекин или контра напад. Дуелот со Атлетико се одликуваше со брза игра и Карваљо го искористи инстиктот, но тој тоа го прави многу често".
"Тешко е да го сопрете Карваљо. Тој и Кедира кои вообичаено не се во центарот на вниманието, беа нашите двајца најдобри фудбалери".
Мурињо најави дека Карим Бензема ќе биде стартер на натпреварот во среда против Мурсија.
"Ми се допаѓа како играат и Игуаин и Бензема. Игуаин за малку ќе постигнеше гол со спектакуларен волеј, Бензема го одигра она што го побарав од него. Тој ја имаше топката во посед и помогна да го контролираме натпреварот. Заврши добра работа. Тој е многу добар технички. Ќе добие шанса да биде стартер против Мурсија".
"Роналдо е тимски играч. Не можам да очекувам тој секогаш да постигнува голови, да ја краде топката во средината и да постигнува голови. Тој е фудбалер кој ја прави разликата. Доколку работи напорно како што тоа го прави, не можам да побарам ништо повеќе од него. Јас сум повеќе од задоволен од неговата работа. Тој е голем фудбалер и среќен сум што го имам".
"Лас е одличен играч. Фудбалерите кои се на клупа работат многу напорно и секогаш се подготвени да му помогнат на тимот кога е потребно. Тешко ми е да оставам на клупа фудбалери како што се Гранеро и Диара. Тие се тимски играчи, и така се освојуваат титули".
Powered by: 24 FUDBAL.com.mk
