Англија Англиската ѕвезда, Дејвид Бекам вели дека ќе го одработи целиот договор со ЛА Галакси до 2012 иако според договорот може да си замине и година порано.

Договорот на Дејвид Бекам со ЛА Галакси истекува во 2012 година, но доколку сака Англичанецот може да си ја откупи последната година.
Сепак, Бекам вели дека нема да го направи тоа и во целост ќе го испочитува договорот.

"Сакам да играм додека нозете ме држат. Знам дека тоа не звучи најдобро, но навистина сакам да играм фудбал. Тоа е мојата страст. Кога ќе почувстувам дека не можам повеќе, тоа ќе значи крај на мојата кариера" - изјави Бекам.

"Ќе го одработам договорот до крај. Синовите тука ми одат на училиште, на сите ни е убаво а и не гледам причина зошто да се селиме".

Бекам не крие дека сеуште посакува да игра за англиската репрезентација.

"Би сакал да продолжам да играм за Англија. Дали ќе биде така, зависи од моите игри и од одлуката на селекторот".

Две години по ред Бекам за време на паузата во МЛС настапуваше за Милан, вели дека би сакал така да биде и сега, но потребен му е одмор поради повредата.

"Би сакал тоа да го направам повторно, но повредата која ја имам бара одмор" - заврши Бекам.

Дејвид Бекам синоќа беше стрелец за Галакси во победа од 2-1 над Далас.

Powered by: 24 FUDBAL.com.mk