ЕВРО 2012 Поради дивеење на српските фанови, натпреварот во Џенова помеѓу Италија и Србија не го доживеа својот крај.

Квалификацискиот натпревар за ЕВРО 2012 помеѓу Италија и Србија, најпрво доцнеше поради инциденти на трибините, а подоцна по само седум минути игра беше и комплетно прекинат.
Српските навивачи со инциденти започнале уште во хотелот на фудбалерите на нивната селекција, неколку хулигани се обиделе да го нападнат голманот Стојковиќ но биле избркани.

Потоа се обиделе да го нападнат Стојковиќ и во автобусот со кој фудбалерите се превезувале до стадионот, но соиграчите на голманот спречиле поголем инцидент.

Навивачите на Црвена Ѕвезда не можат да му го опростат заминувањето на Стојковиќ во Партизан, па тој беше главна мета на хулиганите.

Стојковиќ исплашен за својата безбедност одбил да излезе на теренот, па Србија на Луиџи Ферари излезе со својот втор чувар на мрежата.

Дивеењето на фановите се префрли на стадионот, гостинските навивачи фрлаа бакли на теренот, а кога судијата оцени дека повеќе нема услови за игра, и конечно го прекина натпреварот кој веројатно ќе го добие Италија со службени 3-0.

Шефот на обезбедувањето на натпреварот, Роберто Масучи вели дека не можеле ниту да замислат дека ќе се случи ваков неред.

"Вака опасни навивачи не смееа да дојдат во Џенова. Од претходни искуства бевме подготвени, но не можевме ниту да замислиме ваква агресивност" - изјави Масучи.

Селекторот на Италија, Чезаре Прандели е разочаран поради прекинот на натпреварот.

"Изгледаше како се да е организирано. Од српските фудбалери слушнавме дека нивниот автобус е нападнат. Пред натпреварот српскиот голман Стојковиќ беше во нашата соблекувална и тој не се плашеше само да го одигра натпреварот, туку се плашеше и како ќе се врати дома. Беше многу збунет" - изјави Прандели.

Powered by: 24 FUDBAL.com.mk