ЕВРО 2012 Македонската фудбалска репрезентација денеска на Филип Втори Арената ја пречекува силната селекција на Русија.

Македонија пред тежок испит, на гости ни доаѓа репрезентацијата на Русија во рамките од четвртото коло во Квалификациите за ЕП 2012.

Победата над Андора го крена расположението во пресрет на овој многу значаен натпревар, но Русија е сосема поинаков противник, селекција која предизвикува голема почит, и која располага со повеќе од солиден состав.

Селекторот Мирсад Јонуз нема да може да смета на повредените Горан Пандев, Горан Попов и Дарко Тасевски.

"Оваа селекција на Русија е посилна од онаа која пред 4 години лесно победи во Скопје. Аршавин, Џагоев, Билјадетинов .... се се тоа играчи кои настапуваат во најсилните европски тимови." - изјави Јонуз на синоќешната прес конференција.

"Ние ги гледавме касетите на Русија со Словачка и Ирска , тактиката е делумно подготвена и по вечерашниот тренинг ќе одлучиме со кој состав ќе настапиме. Би бил пресреќен ако победиме, но и ако не загубиме".

"Ситуацијата во групата е интересна, Ерменија покажа дека се можни изненадувања и ние максимално подготвени ќе влеземе во пресметката со Русите".

Репрезентацијата на Русија во Скопје допатува по победа на гостувањето во Ирска, фудбалерите на Дик Адвокат во одлично расположение ќе истрчаат на Филип Втори Арената по трите бода.

Аршавин ќе биде главната ѕвезда на Русија вечерва, но тука се и Жирков, Џагоев, Кержаков...

Билансот со Русија ни е негативен, во квалификациите за ЕВРО 2008 бевме во иста група, натпреварот во Скопје го загубивме со 2-0, во Москва бевме поразени со 3-0.

Македонските фудбалери вечерва ќе треба да го дадат максимумот и со поддршка на публиката да одиграме добар натпревар и дојдеме до посакуваниот резултат, победа против големиот противник.

Натпреварот се игра на Арената Филип Втори со почеток во 20.30, директен пренос на МТВ.

Powered by: 24 FUDBAL.com.mk