Италија Диего Марадона сака да го прослави својот 50ти роденден на Сан Паоло во Наполи, објавува Gazzetta dello Sport.

Легендата на светскиот фудбал, Диего Марадона своите најдобри денови од кариерата ги помина во Наполи каде што престојуваше седум години.
Марадона на Наполи му ги донесе првите и единствени две Скудета, Аргентинецот вели дека посакува да се врати во градот каде ги доживеа најдобрите моменти во кариерата.

"Во животот имав се, фамилија која ја сакав, фантастична кариера, и денес благодарение на Бога, нема што да побарам повеќе" - вели Марадона.

"Мојата единствена желба e уште еднаш да ги прегрнам луѓето од Наполи кои никогаш нема да ги заборавам".

"Има работи кои остануваат во вас и никогаш не можат да излезат. Освоив две Скудета и УЕФА Куп таму, како и Куп на Италија и Италијански Супер Куп".

"Но Наполи исто така ми беше важен за титулата која на Светското првенство ја освоив со Аргентина 1986 во Мексико. Наполи го напуштив во одлична физичка и ментална состојба бидејќи бев среќен одвнатре".

"Најубавиот дел од кариерата, најубавите моменти ги поминав во Наполи и сеуште имам пријатели таму" - заврши Марадона.

Според весникот, Марадона го повикал неговиот стар пријател Салваторе Бањи, да му помогне да организира натпревар на 30. октомври (роденденот на Диего) на Сан Паоло на кој ќе настапи со неговите поранешни соиграчи од Наполи.

Бањи ќе се сретне со претседателот на Наполи, Аурелио Де Лаурентис да види дали ќе биде возможно да се организира такво нешто.

Powered by: 24 FUDBAL.com.mk