Македонија | Македонскиот фудбалски репрезентативец, Езгјан Алиоски доживеал непријатен момент во неговиот роден град Прилеп откако бил избркан од ресторан само поради тоа што зборувал албански.

Алиоски дел од својот одмор решил да го помине во родниот Прилеп. Тој заедно со своите родители и родини седнал на ручек во ресторанот „Ла Страда“, но откако вработените слушнале дека тие зборуваат албански ги избркале со образложение дека нема место, се било резервирано.

Откако виделе дека се работи за Алиоски, од ресторанот брзо ја промениле одлуката и му рекле дека сепак има место, но било доцна, фудбалерот навреден заедно со фамилијата си заминале.

Алиоски потекнува од прилепското село Црнилиште, но на една година заминува со семејството да живее во Швајцарија каде ја почнува и фудбалската кариера.

„Навистина сум фрапиран од тоа што се случи. Играм за Македонија, доаѓам од Англија и со радост играм за репрезентацијата, а еве што доживувам тука. Кога со најблиските зборував на својот мајчин јазик, инаку не кријам дека сум Албанец, дојде еден човек и ми рече да го напуштам ресторанот само затоа што слушна на кој јазик зборуваме. На никого не му го посакувам ова што ми се случи“, изјави Алиоски за „СпортМедиа“.

Извор: 24FUDBAL.com.mk