Македонија Голманот на Работнички, Мартин Богатинов е оптимист во пресрет на големиот натпревар против Ливерпул.

Во четврток во 20 и 45 сите погледи ќе бидат насочени кон Арената Филип II каде што се очекува вистински спектакл, Работнички го пречекува тимот на Ливерпул во третото квалификационо коло од Лига Европа.
Романтичарите храбро се изборија за дуел со англискиот гигант Ливерпул, најголемиот тим кој некогаш гостувал во Македонија, а еден од најзаслужните за елиминацијата на Мика и натпревар со Црвените, секако е голманот на Работнички, Мартин Богатинов.

Мрежата на Богатинов мируваше на натпреварите против Мика, Мартин ја искористи својата шанса и блесна на овие два дуели.

Сега следува нов предизвик, многу многу поголем од претходните, сеуште не е познато со кој состав Ливерпул ќе допатува во Скопје, Рој Хоџсон посакува да извади колку што е можно посилен тим, но клубските лекари го советуваат да не ги игра фудбалерите кои настапија на Светското првенство.

Евентуалното потценување од страна на Ливерпул, може да биде клучна предност за Работнички во првиот натпревар, тоа добро го знае и Богатинов.

"Бевме потценети и од Мика, па видовте како поминаа. Доколку не потцени Ливерпул ништо чудно и тие да поминат како и Мика" - изјави Богатинов за 24фудбал.

"Атмосферата во тимот е одлична и сите со нетрпение го очекуваме натпреварот со Ливерпул".

"Сите знаеме кој е Ливерпул, без разлика со кој тим ќе допатува во Скопје, ова е најголемиот предизвик за Работнички, натпревар на нашите кариери".

"Мотивите кај нас се огромни, ќе дадеме се од себе, ќе се преставиме во вистинско светло и се надеваме дека ќе ја израдуваме македонската јавност".

"На крилјата на фановите кои очекувам да ја наполнат Арената Филип II и да создадат пеколна атмосфера, ќе тргнеме храбро во обид да го изненадиме големиот Ливерпул" - заврши Богатинов.


Фотографијата е превземена од ерменскиот портал www.totalfootball.am

Photographer - Hakob Berberyan/PHOTOPLANETЕ

Powered by: 24 FUDBAL.com.mk