Јужна Америка Според медиумите од Бразил, Роналдињо постигнал вербален договор за преселба во Фламенго

Минатата недела претседателката на Фламенго изјави дека Роналдињо изразил желба да се пресели во Фламанего и таа објасни дека зборовите го слушнала лично од фудбалерот.

За иднината на бразилскиот интернационалец многу се шпекулира во последните неколку недели иако од управата на Милан молчат на оваа тема.

Роналдињо има уште една година од договорот со тимот од Сан Сири со што Росоњерите сега имаат последна шанса да заработат нешто преку негова продажба.

Според Globoesporte, Роналдињо и неговиот брат, кој воедно работи и како негов агент, веќе ги договориле личните услови со Фламенго.

Поранешниот Најдобар Фудбалер во Светот наводно е подготвен да прифати двојно помала плата и да добива 4 милиони евра годишно во дресот на Фламенго.

Сега останува двата клуба да се договорат за висината на оштетата но медиумите се убедени дека Роналдињо е на добар пат да замине од Милан.

Исто така извештаите говорат дека Роналдињо во својот договор имал клаузула според која во јануари може да замине како слободен фудбалер.

Останува да се види дали тие ќе успеаат да постигнат договор со Милан за ангажман на плејмејкерот ова лето или пак ќе чекаат до почетокот на следната година.

Globoesporte вели дека Фламенго се надева дека Росоњерите ќе му дозволат на Дињо да замине бидејќи играчот ќе ослободи големи финансиски средства од буџетот за плати.

Во меѓувреме во медиумите од Италија се појавија информации кои велеа дека Силвио Берлускони сака Роналдињо да продолжи да настапува на Сан Сиро.
 
Исто така со преселба во Милан се поврзуваше и Лукас Подолски.

Powered by: 24 FUDBAL.com.mk