Македонија | Работнички си збогува од Лига Европа откако доживеа тежок пораз на гостувањето во Унгарија, а заврши и настапот за Шкупи кој дома одигра само 0-0 против Ренџерс...

Нема долго европско лето за Работнички и Шкупи, тимовите од Дебар Маало односно Чаир се елиминирани уште во првото коло од Лига Европа.

Работнички успеа да стигна до победа од 2-1 над Хонвед пред своите фанови, но попладнево Унгарците го покажаа својот квалитет и забележаа убедлив триумф од 4-0.

Холендер го отвори резултатот во 6. минута, а истиот играч зголеми на 2-0 десет минути подоцна. Еден гол ги враќаше „Романтичарите“ во живот, но сите надежи за ново изненадување беа срушени во 62. минута кога судијата досуди пенал и му покажа црвен на Ерера. Данило погоди од 11 метри за 3-0, а потоа стави точка на натпреварот со својот втор гол во 84. минута.

Вечерва чудо не успеа да приреди ниту Шкупи, Чаирчани немаа сила да го изненадат славниот шкотски клуб и покрај тоа што избраниците на Стивен Џерард не прикажаа ништо посебно на гостувањето во Скопје.

Битката најчесто се водеше на средината од теренот, имаше малку убав фудбал и 100% шанси па на крајот резултатот беше оној почетниот, 0-0.

Извор: 24FUDBAL.com.mk