СП 2010 Дефанзивниот фудбалер од средниот ред на Бразил, Фелипе Мело не е премногу загрижен за критиките кои ги добива.

Мело беше трагичарот за Бразил на синоќешниот натпревар против Холандија, фудбалерот на Јуве најпрво си постигна автогол за израмнување, а потоа при водство на Холандија заработи и црвен картон.

Иако беше асистент при голот на Робињо, Фелипе Мело беше главниот виновник за елиминацијата на Бразил.

"Ова е најгрдиот момент во мојата кариера. Премногу сум разочаран, но фудбалот е таков" - изјави Мело.

"За несреќа не можете секогаш да победувате на Светските првенства и сега не го направивме тоа".

"Во секој случај јас имав добро Светско првенство и денеска имав добро прво полувреме со асистенција до Робињо".

"Доколку го освоевме Светското првенство, ќе си дадев оценка 10 од 10. Не го освоивме, па се оценувам себе си со 6".

Претходно Мело беше критикуван и за неговите перформанси во дресот на Јувентус, но тој не е премногу загрижен околу тоа.

"Не ми е грижа за тоа што мислат луѓето. Не се плашам од критики. Оние кои разбираат фудбал ја знаат мојата сила. Другите не ме интересираат".

"Среќен сум што ќе се вратам и ќе играм за Јуве бидејќи тие се голем тим и сакам да победувам со мојот тим" - изјави Мело.

Powered by: 24 FUDBAL.com.mk