Лига на Шампиони | Серхио Рамос ја искористи победата на Алианц Арена за да застане во одбрана на тренерот Зинедин Зидан кој добива критики и покрај тоа што бележи големи успеси на кормилото на Реал Мадрид...
Французинот го наследи Рафа Бенитез на тренерското столче на почетокот од 2016, за кратко време ги консолидираше редовите и на „Кралевите“ им донесе титула од Лигата на шампионите по само неколку месеци.
Следната сезона, Зидан го предводеше Реал до уште поголем успех, беше освоена Примера, а „Лос Бланкос“ станаа и првиот тим кој ја одбранил Лигата на шампионите.
„Кралевите“ извонредно ја започнаа и оваа сезона, во Скопје го победија Манчестер јунајтед во Суперкупот на Европа, а потоа ја „решија“ Барселона во Суперкупот на Шпанија.
Но следуваше пад во формата, Реал рано ги загуби шансите за одбрана на титулата во Шпанија, а доживеа и срамна елиминација во Купот, па почнаа да пристигнуваат критики на адреса на Зидан и да се говори за негов отказ.
Реал сега е на чекор до ново финале од Лигата на шампионите отако вчера триумфираше на Алианц Арена, па Серхио Рамос го искористи триумфот над Баерн за да застане во одбрана на стратегот и да испрати провокација до Жозе Мурињо.
„Видете, тренерите на Реал Мадрид секогаш е бидат критикувани, но јас седум години поминав тука без титула во Лигата на шампионите, и тренерите кои беа во тој период воопшто не беа критикувани. Ова особено важи за едно име” – истакна капитенот, алудирајќи на „Специјалниот“.
Извор: 24FUDBAL.com.mk
