СП 2018 | Златан Ибрахимовиќ неодамна порача дека ќе патува на мундијалот во Русија, но сега селекторот на Шведска го „олади“ напаѓачот и истакна дека тој не е дел од неговите планови...



По трансферот во Лос Анџелес Галакси и почетокот на новата авантура со два гола на своето деби, Златан Ибрахимовиќ и неговиот можен настап на Светското првенство се топ тема.

Напаѓачот во неколку наврати навести дека ќе го гледаме на СП 2018, а во последното интервју, во шоуто на Џими Кимел тој порача: „Патувам на мундијалот во Русија. Светско првенство без мене не е Светско првенство”.

Но студен туш за Златан Ибрахимовиќ сега доаѓа од Шведска, селекторот Јане Андерсон вели дека напаѓачот не е дел од неговите планови.

„Златан и уште неколку други играчи кажаа дека повеќе не сакаат да играат за националниот тим по крајот на Европското првенство во Франција и јас ја почитував нивната одлука. Ако некој го променил своето мислење, ќе треба да ми се јави, да седнеме да разговараме и да видиме што понатаму. Но Златан ми се нема јавено” – вели Андерсон.

Запрашан дали во овој момент Ибра е во неговите планови, селекторот на Шведска одговори: „Не, апсолутно не, бидејќи рече дека повеќе нема да игра. Истото важи за сите оние кои рекоа дека повеќе нема да играат”.

Извор: 24FUDBAL.com.mk