Германија и Гана одат во 1/8 финалето, Србија го заврши настапот на Светското првенство откако беше поразена од Австралија.
Србија го заврши учеството на Светското првенство откако не успеа да дојде до поволен резултат во дуелот со Австралија, Кенгурите победија со 2-1.
По победата над Германија, Србија влезе како фаворит во овој дуел, им беше потребна победа, но според развојот на настаните во вториот дуел можеа да одат понатаму и со 2-2, сепак тоа не се случи.
Австралија славеше со 2-1, но победата за нив беше пирова, ги однесе само до третото место, поради послабата гол разлика втората позиција и ја препуштија на Гана.
Србија пропушти неколку одлични можности во првиот дел, особено беше опасна шансата на Красиќ во 12та минута кога го помина и Шварцер, биеше но не го погоди голот.
Подоцна се заканија и Кузмановиќ и Жигиќ но мрежата на Австралија не се затресе во првиот дел.
Вториот дел продолжи со слична игра како во првото полувреме, главно рамноправен натпревар со по некоја шанса и на двете страни.
Во 69та минута Тим Кејхил со глава ја тресе мрежата на Стојковиќ за водство на Австралија од 1-0.
Само четири минути подоцна Брет Холман со удар од далечина го зголеми резултатот на 2-0.
Во 84та минута Србија преку Пантелиќ успеа да намали на 2-1, по што уште повеќе го зголеми притисокот кон Шварцер.
Во последните моменти од натпреварот судијата можеше да досуди и пенал за Србија по игра со рака на Кејхил во својот шеснаесетник, сепак тој не покажа на белата точка и резултатот остана 2-1.
Интересен натпревар одиграа и репрезентациите на Германија и Гана, победија Панцирите со 1-0, но и двете селекции одат понатаму.
Шанси имаше и на двете страни, Асамоа Гијан во 14та минута пропушти идеална можност, во сличен стил подоцна се реваншираше и Озил кој се најде очи во очи со голманот на Гана, но не донесе водство за својата репрезентација.
Сепак Германецот со турско потекло се извади во 60та минута кога постигна прекрасен гол од далечина кој значеше и победа за Германија од 1-0.
Интересен ќе биде 1/8 финалниот натпревар помеѓу традиционалните ривали, Англија и Германија, Гана ќе игра со САД.
Powered by: 24 FUDBAL.com.mk
