Шпанија | Самуел Умтити би можел да замине од Камп Ноу поради ниската откупна клаузула, па Барселона веќе има идентификувано негова замена и ќе тргне по Маркињос од ПСЖ...



Французинот за кратко време се адаптираше на играта на „Каталонците“ по трансферот од Лион и се промовираше во столб на одбраната покрај Жерард Пике. Неговите одлични игри го привлекоа вниманието на неколку гиганти, а ниската откупна клаузула дополнително го прави атрактивен за клубови како Манчестер јунајтед и Манчестер Сити.

Самуел Умтити може да биде купен за 60 милиони евра, сума која без многу проблеми се подготвени да ја платат Жозе Мурињо и Пеп Гвардиола.

„Не е само Манчестер јунајтед, има интерес од неколку клубови, но во моментов не мислам на ова и фокусот ми е само на Барселона. Во светот на фудбалот работите се одвиваат многу брзо, но можам да кажам дека сум среќен тука. Сите знаат дека мојата клаузула не е многу висока, но тоа не ме интересира премногу. Јас само сакам да уживам на теренот, за се друго ќе му ја мислам понатаму” – вели дефанзивецот.

Барселона сака да го обнови договорот на Самул Умтити и да ја покаче откупната клаузула, но играчот во моментов не сака да седне на преговори.

„Не сакам да навлегувам во оваа тема, од моја страна ништо не е започнато. Можби има интерес од другата страна, но во моментов нема никакви преговори”.

Иако приоритет на „Каталонците“ е да го задржат Французинот, тие веќе знаат по кого ќе тргнат доколку Самуел Умтити замине. Маркињос од ПСЖ е идентификуван како прва цел а за ова наводно зелено светло дал и Лео Меси.

Извор: 24FUDBAL.com.mk