Шпанија Спортскиот дневен весник O Jogo пишува дека Реал Мадрид понудил 30 милиони евра плус услугите на Ројстон Дренте за ангажман на Ангел ди Мариа од Бенфика.

Во изминатиот период Реал Мадрид силно се поврзува со ангажман на крилото на Бенфика, Ангел ди Мариа, интересот особено се зголеми по доаѓањето на Мурињо на кормилото на Кралевите.

Ди Мариа во договорот со Бенфика има откупна клаузула од 40 милиони евра.

Жорге Мендеш е агент и на Жозе Мурињо и на Ангел ди Мариа, тој беше во Мадрид на претставувањето на Португалецот како нов тренер на Кралевите.

Медиумите пишуваат дека тој останал и на преговори за евентуален трансфер на 22-годишниот фудбалер во Реал Мадрид.

Дренте не успеа да се наметне во првиот тим на Реал Мадрид, па би сакал да ја продолжи кариерата во клуб во кој би можел да настапува.

Ројстон Дренте пред да потпише за Реал Мадрид во 2007 година беше прогласен за најдобар фудбалер на Европското првенство за фудбалери до 21 година, па би можел да биде атрактивно засилување за Бенфика.

Powered by: 24 FUDBAL.com.mk