МЕНИ

Останато | Пред нас е уште едно лудо трансфер лето во кое се очекува да се случат неколку интересни зделки, како по обичај, клубовите од Премиерлигата ќе го имаат главниот збор...

Сезоната во Европа официјално заврши во саботата кога Реал Мадрид со 4-1 го совлада Јувентус во финалето од Лигата на шампионите.

И додека играчите полека ќе заминуваат на одмор, клубовите ќе работат со полна пареа на засилување на своите тимови.

Се очекува уште едно лудо лето во кое големи се шансите да биде соборен трансфер рекордот.

Се очекува да се случат неколку интересни зделки, и како по обичај, клубовите од Премиерлигата ќе го имаат главниот збор.

Ние издвојуваме 7 големи трансфери кои можат да се случат ова лето:

1. Килијан Мбапе

Младата ѕвезда на Монако импресионираше со одличните игри изминатава сезона, па го привлече вниманието на речиси сите гиганти од стариот конктинент.

На адреса на Монако пристигнаа голем број понуди, Реал Мадрид е спремен да плати дури 135 милиони евра но клубот од малото кнежество до сега одолева на сумите од кои боли глава.

2. Ромелу Лукаку

Белгијанецот е цврсто решен да замине од Евертон во потрага на настап во Лигата на шампионите.

Челси и Манчестер јунајтед се клубовите кои сериозно „загризаа“ а во последно време се шпекулира и со името на Баерн Минхен.

Ромелу Лукаку сака да остане во Премиерлигата, па главната битка ќе ја водат Антонио Конте и Жозе Мурињо.

3. Хамес Родригез

Колумбиецот не е задоволен од малата минутажа во Реал Мадрид, и летоска ќе ја промени средината.

Долго време се најавуваше дека тој веќе се договорил со Манчестер јунајтед, но се уште нема пристигнато официјална потврда.

Интер исто така го посакува Хамес Родригез, а ситуацијата на играчот внимателно ја следи и ПСЖ.

4. Алваро Мората

Шпанецот е уште еден играч од таборот на Реал Мадрид кој сака поголема минутажа, па во потрага на првотимски статус ја разгледува можноста да замине од Бернабеу.

Милан се посочува како главен фаворит за потписот на напаѓачот, а во игра си и Челси и Манчестер јунајтед

5. Пјер Емерик Обамејанг

Подолго време се говори дека репрезентативецот на Габон ќе замине од Сигнал Идуна Парк, и големи се шансите овие најави конечно да се реализираат ова лето.

ПСЖ важи за прв фаворит за потписот на Пјер Емерик Обамејанг, за кого интерес уште пројавуваат и Милан и Манчестер јунајтед, како и клубови од Кина.

6. Алексис Санчез

Чилеанецот има уште една година од договорот со Арсенал, преговорите тапкаат во место, па се поизвесно е дека Алексис Санчез ќе замине од Емирати.

Манчестер Сити и Челси сакаат да го видат играчот во своите редови, но „Топчиите“ преферираат да го продадат Алексис Санчез во странство. ПСЖ и Баерн Минхен се потенцијални дестинации

7. Вирџил ван Дијк

Фудбалерот на Саутемптон е единствениот дефанзивец на списокот, но доколку се реализираат најавите на медиумите, тој ќе направи рекорден трансфер за еден фудбалер од одбраната.

„Светците“ бараат околу 60 милиони фунти, а оваа сума не ги плаши Ливерпул, Челси и Манчестер Сити, кои не се штедат за да стигнат до услугите на еден од најдобрите дефанзивци во Премиерлигата.